خدام أخر زمن !

عزيزى القارئ ربما تندهش للعنوان هذه المقالة

, ولكنى عجبٌت للخدام هذا الزمن , دعنى أروى لك موقف حدث لى أثناء الخدمة فى أحد فصول مدارس الأحد وعندما كنت أتحدث الى أحد المخدومين الصغار بالمرحلة السادسة , كان أحد الخدام بيتعصب على أحد الأطفال بسبب إنه مش مغمض عنيه فى الصلاة , وفى نفس ذات المومنت هو ماكنش مركز ولا مغمض عنيه طوال فترة الصلاة !! , وبعد انتهاء الفترة وأنصراف الخادم دخلت الى فصل الخدمة , ففوجئت بالمخدومين بيقوليلى , يا مستر الاستاذ دا خادم نص كُم !! ,, فقولتلهم غلط كدا يا أولاد محدش يقول كدا تانى , فأجابننى أحدهم قائلاً " يا استاذ احنا نقصد انه بيتعصب علينا بسبب حاجات هو مش بيعملها !

فعزيزى الخادم لا تكن خادم أى كلام ! , لأنك أنت مرأة للمخدومك !

لما أقعد مع مخدوم بيسألنى هل الأغاني حرام ولا لا و أتحفه بمحاضرة طويله ان الأغاني حرام ولا تليق بنا .. وانا موبايلي عليه أغاني و بسمع أغاني .. يبقي انا اي كلام ...

* لما احاول بكل الطرق اقنع المخدوم انه يركز في الصلاه ويغمض عنيه علشان يشوف ربنا ( تصل احيانا الي حد الإجبار ) .. في حين انا كل صلاواتي بدون تركيز او اي اهتمام وممكن مش بغمض عيني أساسا .. يبقي انا اي كلام ..

* لما يغيب المخدوم بسبب كسل او تعب عادي و اوبخه و اسمعه محاضره عن عشور وقته لربنا و ازاي يستخسر الساعتين دول في ربنا .. في حين انا بكل بساطه بغيب بسبب اي حاجه تافهه وبضرب بكل كلامي مع المخدوم عرض الحائط .. يبقي انا اي كلام.

* لما ادقق مع المخدوم في كل وسائط النعمه صلاه ، صوم ، تناول ، اعتراف و اي

حاجه يقصر فيها اعاتبه و افكره بعاقبة التأخير في التناول مثلا .. في حين انا ممكن يعدي عليا شهور من غير تناول او ممكن أفطر يوم جمعه ولا حاجه والاعتراف ده لما أبقي فاضي بقي والاحلي بقي ان لما أمين خدمه او أمين اسره يراجعني في التقصير ده بتضايق اوي .. يبقي انا اي كلام ..

* لما أأكد علي المخدوم عمال علي بطال في كل مناسبة ان ربنا المفروض يبقي رقم واحد في حياته .. في حين انا مخلي ربنا رقم 4 في حياتي انا وكأن الموضوع مُقتصر علي المخدوم بس .. يبقي انا اي كلام ..

* لما اوبخ المخدوم بشده لما يغلط في زمايله سواء بغلط لفظي او أدانه .. الخ ..

في حين انا بعطي التصريح لنفسي بكل بساطه في اي غلط او أدانه .. يبقي انا اي كلام ..

الامثله كتيره المهم النتيجة و هي اني : اي كلام !!
انا اي كلام ..

الكاتب : خدام موقع كنيستى

خدام موقع كنيستى مجموعة من الخدام بدأت خدمتها على الإنترنت يوم 16 فبراير 2015 فى يوم استشهاد شهداء ليبيا الأطهار وذلك بتأسيس صفحة الشهيد العظيم عصام بدار فخر المسيحيه , وببركة المسيح ونعمته تم تأسيس موقع كنيستى فى العيد الأول لشهداء ليبيا الأطهار فبراير 2016 , صلواتكم من اجل الخدمة